حد فاهم حاجه؟

مصر التى فى خاطرى و فى دمى

2011-02-06T13:41:00.000-08:00

مكانش ينفع الحدث ده يعدى على مصر من غير مدونه فى مدونتى كاهم حدث فى تاريخ مصر الحديث

انتفاضة مصر 25 يناير 2011

لم تكن انتفاضه مصر حدث داخلى بل بالعكس نظرا لاهميتة مصر فقد احدثت الانتفاضه المصرية شعور عالمى بالشجب و االادانه لكل ما هو ظالم و مستبد فههى المظاهرات تندلع بجميع دول العالم متضامنه مع شباب مصر و كانها تنظر لمصر و تراقب كيف ستقوم من غفوتها كى تقلدها جميع شعوب العالم الخاضعين لنظم استبداديه

لقد عادت مصر ثانية قائده لكل العالم عادت لدور البطوله عادت و لن ترجع ثانياً لحالة الركوع و الاستسلام

يا مصر قومى و قاومى و استحملى الالم

مهو لازم الجروح كلها تتفتح و تتنظف كويس علشان تلتئم

تحية لكل شهداء ثورة التحرير و التغيير

مكــونـتش اتـوقع

2010-08-19T14:17:00.000-07:00

بجد لما كتبت البوست ده ( أهلاً بالمعارك ) مكونتش اتوقع انى اكمل فى الشغلانه دى اكتر من شــهر واحد مع انى كنت متحفز جداً للتحدى و لكنى ايضاً كنت على درايه بصعوبه المهمه او بالارجح باستحالتها فكل ما كنت احلم به لم يتعدى باى حال من الاحوال و باقصى درجات التفاؤل عن 1/100 مما تحقق فعلاً ( هذه ليست نسبه فرضيه انما نسبه فعليه تعبر عن ما حدث على ارض الواقع ). ان ما حدث افادنى جداً فى طريق حياتى لانه اعطانى عبرة مهمه جداً و لقننى درساً عملياً مهماً جداً و هو

ان من اراد الله له النجاح فى عمل ما. لا تستطيع جيوش العالم كله وقف انتصاراته و كل المؤامرات التى تتم ضده يقلبها الله العظيم لفائدته

ولاد البــــــــــلد

2008-07-29T08:32:00.000-07:00

ولاد البــــــــلد .

ولاد البلد دى كلمه عاديه لها معنى مش عادى
ولاد البلد احرف صغيره تحوى قيم كبيره
ولاد البلد يعنى الشهامه و الرجوله و العطف و الرحمه ولاد البلد يعنى وقفة الشده و الثبات على المبدأ
ولاد البلد يعنى اول ماتشفهم تتطمن و متخافش وتحس انك فى وسط عليتك و انهم اخواتك و اكيد هيسعدوك لو فى ايديهم
بس للاسف مبقاش فيه ولاد بلد و بقى كل الى فى البلد اغراب عنها مش من ولادها بص فى عيونهم وانت تعرف انهم اكيد مش ولاد البلد .و لا شهامه ولا رجوله و لا اى بطيخ

و لو ماشيه اختك و لا مراتك ولا ........ لوحدها لازم هتتعاكس او حد هيتحرش بيها

ده بقى قانون البلد
و لو راجل فى ازمه و محتاج فلوس وانت معاك صعب اوى تديله الا لو كنت متاكد 100 فى 100 انه هيرجع الفلوس دى تانى

حتى لو كان مبلغ تافهه صغير
و الشاطر هو الفهلوى الى يضحك عليك باى شكل و باى طريقه سواء و انت بتشترى او بتبيع او بتصلح او فى اى مظهر من مظاهر التعامل التجارى

و مبقاش فيه منطق و كلمه زى السيف بقه كله زيف
و مبقاش فيه عقل. بقه كله جهل و شويه قطيع ماشين يلقطوا قوتهم من اى غيط برسيم
و مبقاش فيه امان بقه لازم يتقفل عليك بليل 100 ترباس لان الحراميه بقم فى البلد اكتر من الناس

كان نفسى دايما وانا صغير اطلع ولد من ولاد البلد بس للاسف مبقاش اصلا فيه بلد

بحبك ........وحشتينى ............ انا اسف على التاخير

2007-12-15T02:53:00.000-08:00

بحبك .................... و حشتينى ................ انا اسف على التاخير

بجد وحشتينى يا مدونتى و انا اسف ان انشغلت عنك كل ده

بجد انتى كان ليكى اثر جميل و كبير فى حياتى و اتعرفت عن طريقك

على اجمل شخصيات و اروع اصدقاء

متزعليش منى انى سيبتك كتير كده من غير اهتمام و من غير حتى كلمه صغيره تعبر لك على محبتى ليكى انتى اول واحده عارفه انه كان غصب عنى و كمان انتى اول واحده انا حكيت معاها عن سرى و عن حكايتى و انتى كمان اول واحده شجعتنى انى اكلمها و اقولها انى بحبها و بجد نصحيتك الغاليه دى هى سبب و سر سعادتى دلوقتى و سبب اجمل لحظات بعيشها انا و حبيبتى و على فكره هى برضه بتسلم عليكى و بتشكرك

و بجد شكراً لكل اصدقائى الى جم هنا فى غيابى و وقفوا جنب مدونتى و حسسوها انها مش لوحدها و كأنى كنت موجود بالظبط

انشاء الله مش هغيب عنك تانى

أنا حبيت

2007-10-03T01:23:00.000-07:00

مكنتش اتخيل ان اليوم ده ييجى بس اهه جه و انا قاعد دلوقتى على سريرى مش عارف لا اصحى و لا انام مش عارف اركز او افكر مفيش اى شئ مريحنى و لا اى حاجه بتبسطنى غير لما افكر فيها

مش عارف اتضايق ولا افرح
اتضايق لان اليوم ده جه وانا مش مستعد له
و لا افرح لان اليوم ده جه وانا الى كنت خلاص يأست انه ممكن ييجى او احس بيه
تصدقوا اول مره احــــب بجد و افرح بجد لما اشوف حد و اكتر حاجه تضحك انى كمان اكتشفت انى بغير اوى اوى
اكتشفت انى بقيت انسان تانى خالص غير الى انا كنت عارفه او حتى الى كنت متوقعه ده حتى البوست ده كنت متخيل انى هكتبه باسلوب تانى خالص و هيكون حاجه محصلتش و احتمال كمان ياخد

عند احمد شقيرpost of the day

بس طلع كده زى مانتوا شايفين كده ما فيش كلمتين فيه راكبين على بعض
يمكن متلخبط شويه لان ده احساس جديد عليا و احساس فضلت كتير اقاومه واعانده لغاية ما قدر يخترقنى بس بجد حبيته اوى و ندمت اوى انى قعدت اقاومه كل ده

تخيلوا انى مش عارف انام وانا مرتاح من حوالى شهرين تقريباً و يمكن اكتر و كمان ساعات بتصرف تصرفات عيــــــال
و كمان المشكله ان كل ما اجى افاتحها و اكلمها و اصارحها مبعرفش اقول حاجه وارجع تانى البيت اقــعد اكــــــل فى نفسى اليوم كــله و ساعات بحس انها مستنيه منى الكلام و ساعات بحس انها ولا على بالها و ساعات ساعات
بالذمه فى حد شاف بوست زى كده ملوش اول من اخر
بس خلاص كفايه لخبطه لحد كده اسيبكم بقه مع وائل جسار و الاغنيه الى انا بحبها بس بشوية اضافات

احتاجت لى

ولا كان فى بالى الحب ابداً ولا كنت محتاجله
سلمــتلك بعد امـا كـــان يأسى خــــلاص قـــربت اوصلــه

وحياة ما قلبى اديته ليك

أيــاك تخيب املى فيك

مبقيتش اخـــاف فى الدنيا ديا غير عليك

معرفش ليه

كل الكلام ده بقوله ليه

يمكن علشان حسيته نفسى تحس بيه
و انا محتاجلك دلوقتى اكتر ما كنت محتاجلى

2007-08-30T02:04:00.000-07:00

الصور كلها مهتزه و كل ما بداخلى يبحث عن لحظة استـــــــــــقرار

اميرة الصحراء المجاوره

2007-07-25T07:13:00.000-07:00

بجوار مدينتى المفترضة توجد الحدود التي تفصلنا عن سكان الصحراء المجاورة
ممنوع الاقتراب ممنوع التقارب . فانهم لنا كما نحن لهم مجرد كائنات و لكن التعامل بحدود
الى ان رايتها و عبرت معها كل الحدود فاجمل ما فى علاقتنا اننا نفهم طبيعه المدينتين و نفهم الغرض من الحدود

و لـــــكن لا حـــــدود

وجدت بها ما لم اجده من قبل فى اى من بنات مدينتى و جدت بها ما لم اكن اتوقعه من سكان الصحراء المجاوره
قد فتحت قلبها و ادخلتنى لتكون هى بداخلى و ادخلت معها الحـــدود و لــــــكن لا حـــــــــدود
لقد اطلعتها على كل مكنونات صندوقى الذهبى الذى لم يطلع عليه احد من قبل

جائز ان يكون شعورى ناحيتها هذا ناتج من حبى للتغيير فهى مختلفه بالفعل او لانها من بلد اخرى بعيده و هذا مما يجعلنى مطمئن على جميع اسرارى التى لا استطيع البوح بها لبنات مدينتى و جائز ..... و جائز

لكن المهم اننى و هى نفهم طبيعه العلاقه و اننا تفصلنا حـــدود و لـــكن لا حـــــدود
و المهم ايضاً انها بالنسبه لى حاله و ليست حياه فلا حياه مع الحدود

النداهه

2007-07-10T23:50:00.000-07:00

قــــــــــيود بيديه ذات مخـالـب حـديديه مغروسة بالـجسم نـاحية القلب .

و القلب مايزال ينبض و لكن الجسم يتصفى قطره قطره

انها افقدته القدره على الفعل الا بـموافقتها

!!!!!!!!!!!!!!!!!!!!!

و قيود اخرى بقدميه ذات اظافر نافذه بالارض .

و الحركه فى نفس الدائره المرسومه و مع كل حراك يزداد الغوص لاسفل بفعل الاظافر الحديديه
انها تفرغة من محتواه ليتناسب مع طبيعة الارض التى سيدفن بواسطها

اصبح يفعل كل ما لا يريده و لا يقدر على مخالفة ارادتها
كل يوم يمضى ......... نفس الخطوات المرسومه فى نفس الدائره
ان الحياه اصبحت مجرد عادات ........ ادمنتهه عليها .......اصبحت مجرد تمضية وقت

على كل من يمر بهذا البوست ان لا يهتم بترك تعليق
و لكن فقط يحترس فالنــــــداهــه قابعة ..... و منتظره فى ترقب شديد

حكاية بــــــدور

2007-06-25T03:43:00.000-07:00

ملاك فرحان طاير مليان بالحب و المشاعر مليان بالاحاسيس الصادقه النضيفه البريئه الى لسه متلوثيتش
الى لسه مفرقتش بين الست الى مختونه والى لسه متختنيتش

ملاك ماسك فى ايد مفروض انها ايد امــه الى من شر الزمن بتحوش عنه و بتضمه
ايــد سلمتها لايـــد من غير متختار او تقول و تعيد مدام كنت فى ايد امى فاكيد مش هنضر اكيد

الام لهى عارفه ولا فاهمه اهى مربوطه زى غيرها فى ساقيه الخرافات و الجاهليه الى لسه عندنا منها ثقافات

الام متهمه و مظلومه بتسلم بنتها للموت بايديها و على وشها ابتسامه مخدوعة فاكره انها بتحمى بنتها من الانحرافات

متعرفش انها بتقتل بنتها سواء بالموت او بالحيــا سواء بالنبج و المشرط او بجعلها مجرد دميه من غير حس او حيــــا

اختى الصغيره الجميله بــــدور مقتدرش اعملك حاجه غير ان احط صورتك عندى و ابتدى بيك و بدمعى حملة ضد الجهل و الغباء و القرف و الى للاسف بيقولوا عليه حمايه للشرف

و الله هتوحشينا يا ياسمين

2007-06-19T10:01:00.000-07:00

طالعت يوم الاحد الماضى 17-6-2007 مقـال للكاتب فاروق الجمل بجريده المصرى اليوم الرائعة و تملكنى الخوف

على صديقتى العزيزة ياسمين

صاحبة مدونه Skylight

و ذلك لان حلمها بدأ فى الظهور للحقيقه و ما كنا نقوله فى اضيق الحدود على قهوه فى وسط البلد اصبح يعلن على الملئ فى اكثر جريده انتشاراً حالياً فى مصر و ما اصعب ان يتحول حلمك حقيقه فى هذه البلد المحبطة لكل الاحلام فمن يسعون لتحقيق احلامهم ينتقلون لاماكن اخرى خارج مصر اما فى مصر فليس لهم الا مكان واحد ....... بس

طبعاً كلنــــــــــــا عارفينه

. و ايضاً لانهم ضموا اسم ياسمين مع اسماء اخرى لها اتجاهات اخرى اختلف معها او اتفق و تختلف معها ياسمين او تتفق و لكنها ادرجت معهم على نفس الطاوله
مـــالك و علاء و منال و بهيــه و الوعى المصرى و كل من ذكرهم المقال مدونين اجلاء و اكن لهم كل احترام و تقدير و لكن لهم مسلك اخر غير مسلك يــاسمين و الذى يمثل مجموعتنا او كما يطلق علينا ( الجيل التانى للمدونين )
فهم مسلكهم سياسى بحت يمثل جانب معارض للحكومه و نحن معهم فى اغلبية مقالاتهم
و لكن مسلكنا اجتماعى انسانى بحت يؤمن بأن التغيير يجب ان يكون من داخلنا اولاً
لقد خلقنا لانفسنا مجتمع جميل صغير مبنيه اسسه على كل ما هو انسانى بعيداً عن اى تشوهات او ثقافه ملوثه

انا لست سلبى او انهزامى بخوفى هذا و لكنى واقعى و برغم كل شئ سوف استمر ايضاً فى تكملة الحلم وسواء تحقق ام لا و سواء احبطنا او نجحنا يكفينا شرف الحــــــــــــــلم .

و يا ريت متنسوش الـــعيش و الــحلاوه بتوع يــاسمين و كمان السجاير لزوم المعيشه فى الحـــــــلم
و الله هــــتوحشينــا يا ياسمين و مش عارفين اللقاء الرابع هتكونى معانا فيه و لا هتكونى دخلت جوه الحلم ابو قضبان

تحياتى لجميع المدونين لمن استطاعوا بالفعل فرض مساحه من الامل فى بيداء التخلف و الرجعيه و اللاانسانيه

حتى ولو كانت مساحه صغيره فعلى الاقل تكفينى للتنفس

المواطنه قضية بـــــــــلد .............. قضية انسانيه

2007-05-28T06:52:00.000-07:00

مقــــــدمه :-
اعيش حياتى ككائن يحاول المعيشه كأنسان و لكن صعبه هذه الحياه فى وسط كائنات رافضه للوجود الانسانى تفرض ظلالها و افكارها و مبادئها المريضه على كل ما هو انسانى او حتى يحاول

الكلام عام و لكن اخص بالذكر قضيه من اهم قضايا بلدى و اهم قضايا الانسانيه و هى ما يسمى بالتعايش السلمى الانسانى بين اشخاص مختلفون فى العقائد اى ما يسمى بالمــــواطنه ( او التعايش بين المسلمون و الاقباط فى مجتمع واحد )...م

و اسرد هنا بعض من هذه المبادئ و الافكار المريضه التى اقابلها سواء من اخوتى المسلمون او من اخوتى الاقباط

و اتمنى ان ياتى اليوم و تلغى من قاموس تعاملاتنا

1 - مبدأ الاخر الغبى
ان تنظر اليه على انه غبى لانه يتبع هذه الخرافات ( من وجهة نظرك ) و تضحك بداخلك عليه و كلك يقين بانك اذكى منه و اكثر قدره على فهم الامور

2- مبدأ الاخر الهالك

ان تنصب نفسك مكان الله و تدين الاخر متقيناً بداخلك من هلاكه المحتوم فى الاخره و بذلك تنسى نفسك و اخطاءك و تركز على نهايه الاخرين
(0 اهتم بنفسك و انجو بها و الاخر له الله يحاسبه و ليس انت )

3 – مبدأ الانسان للدين
ان تنسى حياتك و علاقتك بربك و تتفرغ لشئ واحد فقط و هو الدعوه و التبشير فى كل مكان و فى اى وقت لهدايه الاخر و كأنك المهدى المنتظر
( للحياه هدف اسمى خلقك له الله فاعبد الله و لا تعبد الدين فالدين للانسان و ليس الانسان للدين
و لتجعل دعوتك من خلال اعمالك و افعالك و اخرهم اقوالك و ايضاً اعلم ان لكل شئ و قت و مكان مخصص له و اكيد ذلك المكان ليس مكان العمل او بداخل المتروووو )

4- مبدأ الفرصه للمثل بغض النظر عن كفاءة الاخر

(فالمثل الاولى بالمعروف اما الاخر فيأتى فى اخر الصفوف )
ان يكن جوهر و مركز تعاملاتك على اساس الديانه و ليس على اساس الاكفء و الاحسن و الدين برئ من ذلك
فدين الله لا يأمرك بأخذ الفرصه ممن يستحقها لاعطائها لرفقائك فى الديانه
و لهذا نجد مؤساسات يغلب عليها الطابع الاسلامى و اخرى يغلب عليها الطابع المسيحى و لا نجد مؤساسات يغلب عليها الطابع الانسانى و طابع الكفاءه و طابع الفرصه لمن يستحقها

5- مبدأ العرائس المتكلمه ( مبدأ الاسطوانات المعاده )م
فالعرائس تردد كلاماً مسجلاً ( محفوظاً ) فى اوضاع مختلفه و هذا ما يحدث عند التطرق الى بعض معتقدات الاخر دون مجرد المحاوله فى التفكير فى مدى صحة هذه المعتقدات و مدى صحة هذه العبارات المسجله و المتوارثه من عرائس الى اخرى
( اترك الاعراف و ابدأ البحث بجديه عن الحقائق دون الاستسلام لتسجيلات الدمى )

6- مبدأ مسرح العرائس

ان تكون توجهاتك و افكارك نحو الاخر مبنيه على اشخاص بعينهم فى ايديهم خيوط اللعبه
فحينما يرفعون اصابعهم ...... ترفع الايادى و حينما تتشنج ايديهم فى تحركات عصبيه ......... ينقلب المسرح الى جحيم

( انزع الخيط و ابدأ فى اخذ القرار من داخلك عن اقتناع و ليس عن تبعيه مطلقه تلغى و جودك و انسانيتك )

تحديث :-أ

لقد قرأت بوست اضطهاد من عنصريه ام جهل فى مدونه الصديقة العزيزه الزعيمه والذى يلمس نفس الجروح ولكن بشكل اشمل و اعم و لهذا اعتبرته تكمله لهذا الموضوع و فضلت ان اضعه هنا لكى يستكمل القارئ اركاناً مهمه من اضطهاد الانسانيه لم اذكرها بالوست و شكراً للزعيمه على هذا الموضوع الرائع و شكراً لكم جميعاً على اهتمامكم بهذا البوست الذى يدل على اهتمامنا بما يسمى الانسانيه

؟؟؟؟؟؟؟؟؟؟؟؟؟

2007-05-17T07:06:00.000-07:00

ما بين معرفه الفارق بين الزيف و الحقيقة حياه

ما بين معرفة الفارق بين الخوف و الامان حياه

ما بين معرفة الفارق بين الحزن و السعاده حياه

ما بين معرفة الفارق بين الاحتياج و الاستغناء حياه

ما بين معرفة الفارق بين الاضطراب و السلام حياه

ما بين معرفة الفارق بين الالم و الراحه حياه

ما بين معرفة الفارق بين التشويش و الوضوح حياه

ما بين معرفة الفارق بين الجسدانيات و الروحانيات حياه

لقد استغرقه الوقت لفهم معانى الحياه حياه

فهل سيستطيع الان ان يحيى الحياه

اهلاً بالمعارك

2007-04-06T08:24:00.000-07:00

لقد تعودت على اجتياز المعارك منذ صغرى سواء بالفشل ام النجاح و تخيلت اننى انتهيت من المعارك لفتره و لكن ها هى معركه جديده اقحمت بها
المكان : العمل
الزمان : شهر4 /2007
الحدث : اصبحت رئيساً لقطاع فاشل بالعمل
المهمه : انقاذ ما يمكن انقاذه و قلب الهزيمه الى نصر و العوده بالاسرى

لقد اخذنى الاستعداد لهذه المعركه من كل اشكال الحياه فوقتى كله مخصص للتخطيط للانتصار
فقد بدأت بالفعل منذ توليتى القياده فحص ادواتى و نقاط الضعف و القوه بالفريق كما بدأت تصفية الجواسيس و العملاء و الان استعد لعمل هجوم مفاجئ للعدو
البدايه الحقيقيه للمعركه 17 / 4 و سوف تستمر على حد اعتقادى حتى اخر الشهر

ادعو لى بالتوفيق و الانتصار فهذه تعتبر من اهم معاركى فى الحياه العمليه
و اهلاً بالمعارك

اللقـــــــــــــاء الثانى

2007-03-16T08:03:00.000-07:00

اللقــــــــــــــاء الثانى

طبعاً هتفتكروا قصـــــــدى على لقــــــــــاء المدونيــــــــــــن بما انه هو الى شاغل عقولنا و قلوبنا كلنا حالياً

بس انا مش قصدى عليه انا قصدى على نــــــــــوته صغيره جداً محتفظ بيها و بسجل فيها دايماً معـــــــــــــاد و مــــــــــــكان و احداث اللقاء التانى لانى بجد اللقاءات دى بتأثر فيا جداً لانى بشوف قد ايه الناس اتغيرت و الزمن اتغير و اليكم بعض مما تحتويه نوتة اللقاء التانى

الحلقه الاولى

( انت مين يا د ........... مش فاكرك ياد )

1 – المكان ( سيتى ستارز ) مكان عملى القديم
الزمان الساعه 7.30 مساءً
اخر مره شفتها فيها :- من 8 سنين فى كليه هندسه جامعة المنيــــــــــــــا
الحدث :- مرت امامى و كانها لا تعرفنى . بل بالفعل انها لا تعرفنى كيف و انا كنت على اعتقاد تام انها كانت مهتمه بى و تبادلنى نفس الاهتمام بالرغم من انها تكبرنى بعـــــــــــــــام
و لكن وضعى كمنسق لاسره جامعيه شهيره فى هذا الوقت كان يمنعنى من الاهتمام باحد اكثر من الاخر فانا كنت كالمغنى الذى يعتقد كل من يستمعه انه يغنى له فقط
و لكنى لن اتركها ترحل بهذا الشكل فقد استجمعت قوايا و ذهبت اليها و كلى اعتقاد انها من المؤكد سترحب بيا تماماً و تتبادل معى الحديث لفتره كبيره
و كانت الفاجأه :- هبه ازيك عامله ايه
ازيك انت ايه المفاجأه دى
انتى ايه اخبارك
تمــــــام بس معلش انــــا فاكراك كويس انت الى كنت منسق الاسره
بس مـــــــــــعلش
مش فـــــــــــــاكره الاســـــــــم
نعم يا اختى ده انا مفياش الا اسم اصلاً احنا هنستعبط ) طبعاً ده الى جه فى دماغى ساعتها

و بعد كده طبعاً فكرتها باسمى و انا متضايق جداً
و اتكلمنا حوالى خمس دقايق او اقل فى كلام اهبل و بعدها مشيت
و حسيت قد ايه ان الدنيا بتتغير و ان الواحد ساعات كتيره بيعتقد حاجات ملهاش اصلاً وجود

وبعد كده رحت على البيت طلعت النوته و كتبت الى حصل وانا بضحك على الايام و على الزمن و مش عارف يا ترى انا الى كنت بتضحك عليه والا هوه االى كان بيضحك عليا

و الى اللقاء فى حلقات اخرى من مسلسل اللقاء الثانى و دلوقتى اسيبكم مع التـــــــتر

و لما تتلاقى الوشوش مرتين عمر الوشوش ما بتبقى نفس الوشوش
بتغيرها دوامات السنين يجى اللقا تانى ولا يتلاقوش
و مين قال ان الى فات ولـــي ده كل شئ فات ساب اثر فى الى جاى
و مين الى بيعيش الزمان احنـــا والا الزمان هو الى بيعشنا فى بحر الحياه

كان ياما كان

2007-03-08T13:11:00.000-08:00

كـــــان يـــــاما كــــــان

كـــــان فيه زمـــــــــــــــــــــــان
ناس حلوين جمال طيبين اسمهم
الــــــمصريين
كانوا مسيحين و مسلمين بيحبوا بعض ......... بيحبوا مــــصر

لـــــحد فيـــهم قال نهاجر و لـــــحد فيـــهم قال يا ناس ده احنا مـــــضهدين
و لحد تانى قعد يزعق فى صلاه جمعه و كفر اخوانه الــــــمؤمنين
لـــــحد فيـــهم عمل مظاهره بالاف كتيره لطرد اخواته المسيحيين
و لحد تانى عمل برامج فى فضائيات تجرح اخوانه المسلمين

و لو نزلت فى يو م لشارع
تلاقى حب و حضاره و تلاقى ورد و لا فيه خلاعه ولا فيه صياعه و لا فيه تحرش لناس جعانه من كتر جوعهم نسيوا

شهامة الـــمصريين

و لا فى عــــــــــاكف و لا فى حاجه اسمها الاخوان المسلمين
الكل اخوه الكل واحد و اسمهم الاخوه المصريين

لحد كافرو لحد فاسق و باع قضيه و لا عــــميل
و مفيش مؤامره و لا فيه مقامره على مصلحه المصريين

و لا فى فتنه و لا مسرحيه تسوء صوره المسلمين
و لا فيه مخرب يطلع يقولك ان المسيحين لكتاب الله محرفين
و لا فيه حجاب و ان كان حجاب فمش على عقول المواطنين
و لا فيه نقاب و فكر وهابى .من الجزيره بيلغى جذور المصريين

و لا فيه مايكل منير و عامل فيها كبير المصلحين
و لا فيه مهجر و ان كان فيه مهجر فاقباطه لمصر مخلصين

و لا فيه حاجه فى اى وقت باى شكل و اى فكر تقدر تفرق
ايد جرجس من ايد حسين

********************

ودى حكايه لجد مصرى من زمــــــــــان
فى حلم جه. لحفيده قاله

اصحى بسرعه من نوم سنينك و حط ايدك فى ايد اخوك

فى ايد جرجس فى ايد حسين

علشان حفيدك يحكى لحفيده
بـــان جده قدر يرجع كــــــل الى كـــــان........ للـــــمكـــان

و اوعاك يعدى بيك زمانك....... و الاقيك لـــــــسه بتحكى

حــــــــــكاية

كــــان يـا ما كــان كــان فيه زمان نـــــاس ................... اسمهم الـمصريين

شـــــفت مـــصر

2007-02-24T08:40:00.000-08:00

شفت مصر امبارح بناسها الطيبين الجمال المتحضرين

شفت مصر برجالتها و ستاتهــا

بمفكرينها و مثقفينها
بكتابـــــها و شعرائــــها
بفنانينها و مـــــبدعينها
بمصورينها و رسـامينها
بخفه بدمهـــا ببسطتــها
بشمالــــها و جنوبهــــا
بسمـــارها و بياضهـــا
بكبارهــــا و صغارهــــا
بتحضرها و تحررهـــــا
بتقدمهــــا و التزامهــــا
بمسلمينهـــا و اقباطهـا
بجدعنه ولاد البلد
بضحكتها الى ماليا الدنيا
بجرائتها و حذرها
باحترامها لانسانيتها

مش عايز اطول عليكوا انا بس كنت عايز اقول لكم ان امـــــــبـارح

انــــــا

شــــــــفت مــــــــــصر

المكان قهوه البورصه
الزمان 23 / 2 / 2007 اللقاء الثانى للمدونين

بشكر كل اصدقائى المدونين الى رسموا صورة مصر الى انا كان نفسى اشوفها من زمان

و انا بدورى هحاول ارسم لكم بعض من ملامح اصدقائى طبقاً لما تركه لقائى الاول بهم بداخلى

سكاى لايت الفكرر المتحرر الملتزم المستنير
استاذنا حسنى سليمان روح الشباب المتجدد المتدفق
استاذنا احمد شقير الشخصيه المصريه النموذجيه
سمراء النيل اجمل ابتسامه و معاها اجمل حدوته مصريه
راسبوتين الصامت – جدعنه ولاد البلد
احمد حداد الشاب المتفجر بالموهبه و الابداع
فورزن لاف ضحكه صافيه و احساس ابعد من الخيال
مصر هى امى المحبه الخالصه من اى شوائب
الالـــــيان الفكر الراقى و طاقه من الحس المرهف
اريدك انثى الصغير العملاق فى الشخصيه و الجديه
ابراهيم معايا خفه الدم و بساطه الروح و صدق الاحساس
لسعة الدبور قوه الحضور و اللباقــــــه و سرعة البديهه
ايجـــــلز الممتلئ بالحيويه و المتحمس دائماً
مايكلتوو طيبه كل المصريين و انسان يدخل القلب على طول

سكاى لايت

http://amyasser.blogspot.com/

حسنى سليمان

http://hosny45.blogspot.com/

أحمد شقير

http://shokeir.blogspot.com/

سمراء النيل

http://anooojy.blogspot.com

/أريدك انثى

http://oredoky-ontha.blogspot.com/

الدبور

http://dabbor.blogspot.com/

مصر هى أمى

http://misr-hya-omi.blogspot.com

The alien

http://alien-besho.blogspot.com/

مايكل محسن

http://michealito.blogspot.com/

Frozen love

http://m-rashed.blogspot.com/

ahmed_h

http://ahmedhelmasry.blogspot.com/

The eagles

http://hoba28.blogspot.com/

راسبوتين

http://raspoutine1.blogspot.com/

ابراهيم معايا

http://anaweana.blogspot.com/

البراءه

2007-02-19T06:36:00.000-08:00

الجميع ينتظرون خارجاً بتوتر شديد
الوقت طال لاكثر من ساعه داخل غرفه د / محسن برسوم وهذا معناه انه اصابه المرض اللعين
الوقت يمر ببطء و معه تفكير شديد بمصير الام و الاطفال السبعه

و اخيراً يخرج المريض و على وجهه ابتسامه مزيفه يحاول بها ترويج الامل الكاذب يحاول بها طمئنه الجميع
فالحقيقه مؤلمه ( مع انه لم يعرف الا نصف الحقيقه ) الكل يهرع اليه بينما ......... ما يزال اخيه داخل غرفه الدكتور ...... يستمع لبقيه الحقيقه الى اخفى نصفها عن المريض

يخرج الاخ محاولاً ايضا ترويج الامل الكاذب .......... و لكن عيناه تفضحه فالحمل ثقيل و الحقيقه مرعبه و هو والـــــدى وانا الوحيد الذى اعرفه جيداً

و يتصل الاخوه من الخارج من امريكا و كندا و استراليا و ليسمعوا نفس الامال الكاذبه
لا ينقطع رنين الهواتف من جميع الانحاء فالكل يريدون الاطمئنان و الكل يستمع لنفس الاحاديث الكاذبه

ينفض الجمع بعد ساعات . الكل يعود لدياره الكل ذهب ليستريح من عناء يوماً قاسً
الا والــــــدى الذى لم يعرف طعم النوم . فقد انخرط فى البكاء كطفل صغير و لم يوقفه عنه الا صوت

عـــــــــمــــــى

( يحادثه قائلاً ( متزعلش دى الــــبراءه .......... الى انا كنت مستنيها من زمان

ادعوا لـــعـمـى بالشفاء و لوالــــــدى بالتحمل و الصبر فالمشوار طويل
و لا ينقذنا منه سوى يد الله الرحيمه

تاجى

2007-02-07T22:55:00.000-08:00

صديقتى العزيزه مروه صاحبه مدونه الناى الحزين http://loveallah.blogspot.com/
دبستنى التدبيسه دى و علشان كده انا كمان هدبسكم معايا
و الى عايز يعرف حاجات عنى محدش عرفها قبل كده يدخل فى التدبيسه دى

1 - اول حــــــاجه محدش عارفها عنى ان النهارده عيد ميلادى طبعاً من المدونين لان اصحابى كلهم عارفينها وكمان انا بتصل بيهم لو كانوا نسيوها علشان افكرهم بالهديه ( و دى يعرفكم على اول ميزه فيا و هيا الكسوف و الاحراج الشديد )
يوم 8 / 2 / 1978 بالعاصمه البريطانيه لندن الساعه 4 الفجر
اوعوا تنسوا انتوا كمان و منتظر هدياكم و يا ريت تكون قيمه
او ممكن تبعتولى عنوانكم و انا اجى لغايه البيت اخدها
يعنى متعملوش تكليف

2 - تـــــــانى حاجه انى بحترم الاكل جداً جداً لدرجه انه ليه طقوس معينه و لا يمكن لاى سبب من الاسباب حتى لو خربت مالطه انى اتكلم و انا باكل و علشان كده اصحابى مسميينى عبد العـــــــال ( نسبة لاحمد بدير فى رايه و سكينه ) لما كان قاعد بياكل و مطنشها ........... اهو انا بعمل كده بالظبط و يباختها الى هتتجوزنى . بس الحمد لله جسمى رياضى وواد رشيق و ستايل . و كمان مش بعترف بالكلام الفاضى ده الى اسمه عشاء العمل و غداء العمل ........... الغداء و العشا للاكل بس ( و ده يعرفكم تانى ميزه فيا و هيه انى اكيد هكون مدير مشروعات ناجح)

3- ثــــــالث حاجه ان ليا اتنين صديقاتى بنات زى العسل بحبهم جداً و مرتبطين ببعض جداً و كمان عاملين لنفسنا يوم سنوى بنتجمع فيه و نحتفل بعيد صداقتنا اليوم ده هوه 13 / 3 / من كل سنه و اختيار اليوم ليه اسباب خاصه هاحتفظ بيها لنفسى
بس بجد انا بحبهم جداً و يا ريت يشفوا التاج ده علشان يعرفوا
بس لأ مش لازم هما عارفين من غير حاجه

4- رابــــع حاجه محدش يعرفها خالص عنى
ان وانا صغير فى المرحله الاعداديه كنت اشطر واحد فى المدرسه و علشان كده كانوا دايماً فى لجان الامتحانات يجبرنى المراقبين على تغشيش باقى اللجنه علشان نتيجه المدرسه تتطلع حلوه و كنت بتضايق جداً جداً من ده لانى بحس انهم ياخدوا منى حاجه مش من حقهم بس للاسف مكنتش بقدر اقول لهم لأ
و فى يوم جتلى فكره كويسه جداً و بقيت اعملها على طول وانا مرتاح البال و هيه انى اغشش العيال فى اللجنه ثلاث اسئله صح و على الاقل سؤال غلط
و بكده اضمن انى افضل متفوق عليهم وده حقى و كمان اضمن انى مضرهمش و قد كان
بس دلوقتى ضميرى تعبنى شويه ..

5- خـــــامس حاجه محدش يعرفها خالص عنى انى اتقدمت علشان ارتبط بواحده صديقتى ولكنها رفضتنى
قال ايه لانها حاسه انى زى اخوها

بالذمه فى واحده عاقله ترفض عريس لقطه زيى
يا ريت لو شفتوها تبقوا تعرفوها غلطها .......... بس بينى وبينكم هيا كان عندها حق ...... احنا مكناش هننفع لبعض

يا ريت مكونش طولت عليكم ولو طولت بقه فده مش غلطتى ........ الناى الحزين هيه الى دبستكم معايا
اما بالنسبه للخمسه الى مفروض ابعتلهم فانا حاسس اصلاً ان كل الناس اتبعتلها و مش عايز ابعت لحد يكون اتبعتله قبل كده
و على العموم الفكره نفسها جميله و انا بشكر الى اخترعها و بدأها وكمان بشكر اوى صديقتى الناى الحزين و كمان بقولها فعلاً عندك حق انا اتبسط كتير بعد ما كتبت التاج و كمان مبسوط جداً بصداقتك

لقد اغتصبوا كرامتى 2

2007-01-28T07:24:00.000-08:00

سلسلة انـــــــــــــــــــــــــات

لقد اغتصبوا كرامتى

الجزء الثانى

لقد توقف الكون بالنسبه اليا و قد تجمدت الصورة امام عينايا و لم اعد ابصر سوى لحظات الاختراق القذر و حتى لم اعد ابصر كرامتى
و قد سكتت الدنيا بالنسبه لاذنايا فلم اعد اسمع من صوت الحياه شئ و لا حتى صوت استغاثه كرامتى
لحظات رهيبه مرت بى و انا ما بين الموت و الالم
الى ان امر جنوده بالقائى خارجاً انا وكرامتى ........................... كرامتى !؟............... اين هى ..........؟ انها غير موجوده ............................!!!!!!!!!!!!
اااه اه .... لقد اخذوا كرامتى....... و تركوا لى كائن مشوهاً بين ضلوعى
لقد اغتصبت كرامتى و حملت وولدت فى نفس اللحظه ابناً غير شرعى. ابن مشوه المعالم ممزق الشخصيه مزيج بين الخوف و رغبة الانتقام
لقد اخذوا كرامتى وتركوا لى وليد الاغتصاب ..........
هل يا ترى ساستطيع العيش بدون ان اراها مجدداً بدون ان اسمع صوتها و هى تحكى عنى حكايات الابطال
هل يا ترى سوف استطيع العيش هكذا و قد تبدلت جميلتى و حبيبتى بابناً مشوه الانسانيه .... ابن يحيا لكى ينتقم و لكن فى داخله تجرى ينابيع الخوف ... تهدد كيانه .. تشل حركته ....... تمنعه من الانتقام من مغتصبيه
فيتقوقع فى مكانه ......... يخرب بيته ........... انه ينتقم ............... ينتقم......... و لكن ليس من مغتصبيه
انه ينتقم ..................... منى انـــــــــــــــــــــا

لقد اغتصبوا كرامتى

2007-01-17T04:24:00.000-08:00

سلسلة انات

2- لقد اغتصبوا كرامتى
الجزء الاول

لقد ارتبطت بى منذ ولادتى فهى تكبر معى و تنمو معى و تأكل و تشرب معى فقد وجدت بى نعم النصير و نعمه الرفيق فقد علمنى والديا كيف ادافع عنها و اصونها فهى رفيقة حياتى و رافعة رأسى و كانت تحبنى و تعشقنى عشق المحبين بل وتتباهى بى امام رفيقاتها و تحكى عنى قصص الابطال و الفرسان و توصف مواقفى و حروبى فى الدفاع عنها حتى لو تكلف ذلك حياتى
فقد تعلمت كيف ادفع عنها بالحق و رغم ضيق العيش فانا لا اشعرها بالفرق بينها و بين مثيلاتها ممن يمتعون برغد العيش فانا ابذل كل جهدى لكى اجعلها دائماً عاليه فى السماء. فانا لا اطيق ان يمس احد شعرة منها و لا اقبل ان تجعلنى الظروف مهما قست افرط فى حقها ................ حتى جاءت اللحظه التى فاقت كل احتمالاتى و كل طاقاتى............. فقد فاجأني و انا اؤدى واجبى و عملى فى هذه الحياه من يريد ان يأخذ حق ليس له و يتمرد على النظام و يضع نفسه فوق الجميع و فوق سلطة القانون و حين منعته بحكم موقعى وجهه لكرامتى سيلا من السباب بالفاظ جارحه تخدش حيائها فهى غير معتاده على استقبال مثل هذه الالفاظ و حين رأيتها فى هذا الوضع تحرك فيا قلبى فانا ادافع عنها طيلة عمرى و انا من ضحى باشياء كثيره حتى لا اعرضها لمثل هذه المهانه فلماذا يحدث لها هذا ......... و استجمعت قوايا و كل ما تعلمته على مدار السنين من مواقفى المتعدده فى كيفية حمايتها و ثورت فى وجهه ........... كيف يكون لك ذلك و بأى حق تجرح كرامتى ؟
و فوجئت بما لا اتوقعه ولا اتصوره فقد وجهه لكرامتى سيلا من اللكمات و امر من معه بأن يعيقوا حركتى حتى لا ادفع عنها ....... و انا اراها امامى تصرخ من الالم .......... و لم يكتفى بذلك بل قيدنى انا و هى و اخذنى لمكان مجهول و اصر على استكمال ما بدأه من سلسله المهانه و امر جنوده باحكام قيودى و امسك بوحشيه بكرامتى بغير مدافع ...... و نزع عنها لباسها و كشف عورتها ........ و ادخل ........................................... اه

اها اه .............................. اه .... لقد اغتصب كرامتى امام عينى ........ ..................... ........

to be continue

خيانة عيد الميلاد

2007-01-07T13:24:00.000-08:00

سلسله انـــــــات

1- خيانه عيد الميلاد

لقد تعودت على خيانته يومياً برغم من كل ما يقدمه لها من حب و يعرفه عنها من ضعف
فهو يعلم ان الخيانه بها ليست عن حب للخيانه او كره له ولكن عن ضعف مقيت و رهيب بشخصيتها
و لكن هذه المره مختلفه تماماً فقد قدم لها كل ما كانت تحلم به بل واكثر بكثير متمنياً ان تقدر ان تهزم ضعفها بسلاح الحب متمنياً ان يقوى الحب بداخلها و يتغلب على مناطق الضعف المغذيه للخيانه و خاصاً ان عيد ميلاده اقترب هذه المناسبه الرائعه بالنسبه له ولها و الذى يتسابق فيه كل الاحبه لكى يعبروا عن حبهم له . و هذا العيد بالذات مختلف لانه قد اعطى لها الكثيرو الكثير من غير حساب راجياً منها ان لاتخونه مره اخرى و ان تتغلب على ضعفها و هو ايضاً يعلم جيداً انها وان خانته بجميع الايام فهى لاتخونه بهذا اليوم بالذات و لهذا فهو ينتظر هذا اليوم لانه الوحيد بدون خيانه
و يأتى العيد و يتسابق الجميع فى اظهار حبهم له بكافة الطرق اما هو فيتطلع لها من وسط الزحام فلا يجدها معه ........ انها كعادتها تخونه مره اخرى و هذه المره فى العيد فى عيد الميلاد فماذا بقى لها ان تقطعه من حبال المحبه و مع هذا فحبه لها يزداد و عطاياه لها لا تقل بالرغم من خيانه عيد الميلاد . .
الــقـصه انتـهـــت و الـمعنى بــداخــــلى

الى صديقى 2006

2006-12-31T03:32:00.000-08:00

ساشتاق اليك ايها العام و سأظل دوماً اتذكرك مادمت حياً لقد احببتك كل يوماً بك احببت شهورك و اسابيعك احببت صيفك و شتائك و الان سوف تتركنى وحيداً
و كيف لا احبك و قد عرفت معك كل معانى الحب ............ الحب الحقيقى و كيف لا احبك و قد عرفت معك معنى النجاح ............ النجاح الذى لم اكن احلم به او اتوقعه ....... نجاح تجاوز كل احلامى و طموحاتى
و كيف لا احبك و قد اقتربت معك من الله اكثر و اكثر حتى اننى اصبحت احادثه و هو يداعبنى و يا له من احساس راق احساس القرب من الله و كيف لا احبك و قد عرفت معك معنى طعم السعاده الاسريه بشكل لم اعهده من قبل
وداعاً صديقى يا من وجدت بك اختاً جميله احبها بكل قلبى اختاً ليست من دمى و لكنها من فكرى و قلبى ......... وداعاً يا من وجدت بك نجاحاً فاق كل تخيلاتى فقد تضاعف معك راتبى لاكثر من سته مرات عنه فى العام الماضى
لقد كان كل يوم داخلك يبعث لى بكثير من الدروس و بكثير من الثقه و بكثير من الحب
و سيظل اثرك دائماً موجود بكل حياتى
وداعاً يا صديقى العزيز و لا تخف فقد تعلمت معك كيف اواجه القادم الجديد بغير خوف فانا لدى الاسلحه المناسبه لاستقبال سنه جديده و هى حب الله و نجاح حقيقى و اسره جميله و اخت جديده

التوربينى

2006-12-25T04:27:00.000-08:00

بتتضيق الخناق على التوربينى اعترف بارتكابه لجميع حوادث قتل الاطفال فى الفتره الماضيه فى محيط دائرة القاهره و الدلتا كما اعترف بانه المسئول الاول عن حادث قطار طنطا سنه 98 و الذى راح ضحيته حوالى 60 مواطن و ينتظر خلال الفتره القادمه بتتضيق الخناق عليه اكتر و اكتر و مواجهته بالادله الدامغه ان يعترف بارتكابه لحوادث قتل الاطفال ليس فى دائرة القاهره فقط بل فى جمبع عموم الجمهورية كما سيعترف بالتاكيد عن مسئوليته فى ارتكاب حادثتى العباره سلام 98 و سلسله حوداث اصطدام قطارات السكك الحديديه
و لكنه سوف ينفى مسئوليته عن احداث طابا و شرم الشيخ حيث ان فاعلهم هو زميله حناطه و ليس للتوربينى ادنى مسئوليه عنهم
انتهى التقرير

Don`t Wait

2006-12-23T05:54:00.000-08:00

مقياس كرامة الفقير

2006-12-11T05:55:00.000-08:00

لا اصلاح ولا تغيير فى بلد لا تصون كرامة الفقير

الرجل فى بلدنا يتحمل الاهوال و الاهوان و لا يشتكى او يتوجع او ينكس الرأس فكرامته تكمن فى ان يوفر الكرامه لزوجته و اولاده و لكن اين هى هذه الكرامه فى وسائل المواصلات و اقسام الشرطه بالذات لا توجد كرامه لفقير فى وطننا هذا فقد صارت مصر و عاصمتها بالذات قاهره للفقير و مذله له فهو يتعرى فى اقسام الشرطه و لا مانع من تعرية عائلته و اولهم زوجته و اولاده و ابائه ايضاً ان لزم الامر

و هو ايضاً يطحن و تدوسه الاقدام و يتناحر و يتزاحم مع اقرانه من الفقراء فى صراع وسائل المواصلات اليومى
الذى لا يرحم كبير او صغير ولا عجوز او امرأه حتى ان اجساد النساء اصبحت بلا حواجز و اصبح التحرش بهن طبيعى بقصد او بدون حتى انهن اصبحن لا يستغربن ذلك فهن من طائفة من لا كرامة له و هذه هى وسيلة المواصلات المتاحه لهن .
قد اصبحت مصرنا و عاصمتها قاهره للفقير و مذله له

و لا يمكن قياس اى تقدم او اصلاح او تغيير فى بلدنا الا بمقياس واحد فقط و هو مقياس كرامة الفقير فهذا هو اصدق مقياس على تقدم اى بلد

لخبطه - 3

2006-10-25T05:40:00.000-07:00

عندما ترى مفترق طرق بدون اشارة او عسكرى مرور فستجد ان كل الطرق تسير فى نفس الوقت و الى كل الاماكن و هذا يطلق عليه لخبطه و ايضاً عندما تفكر فى مواضيع كثيرة فى نفس الوقت و هذا ما يحدث احياناً بداخلى و اليكم هذه اللخبطه

1- من المفروض ان لا تكون الرغبه فى الفعل من عدمه معتمده و تاليه لاغراءات معينه بل تكون الاراده مؤكده فى الفعل من عدمه بوجود الاغراءات من عدمها
2- الاستماع للاغانى الرومانسيه بدون وعى حقيقى يشحن الانسان بمشاعر زائفه يفرغها فى اقرب مكان
3- اعيش احياناً فى حاله من شيزوفرنيا الروح
4- فى الوقت الذى يبحث فيه كل انسان فى العيد على كل ما هو موضه و جديد يوجد اخ له لم يعرف يوماً معنى ان يرتدى ثوباً جديد
5- اصعب قرار ان تقرر ان تفشل لكى تنجح
6- عندما يصيب الشلل مراكز الحس بالروح يصبح الخطأ و الصواب سيان و تصبح الحياه مجرد تمضيه وقت
7- عالم الشهوات مبنى على نظرية الغنى الغبى و عالم الماديات لا يرحم اليعازر
8- لقد كذبت على كل المحيطين بى و ابعدت عنى كل خطأ و تقصير و اثبت لنفسى اننى مازلت مريض . مريض بعباده النفس و الناس

لخبطه - 2

2006-10-25T05:27:00.000-07:00

عندما ترى مفترق طرق بدون اشارة او عسكرى مرور فستجد ان كل الطرق تسير فى نفس الوقت و الى كل الاماكن و هذا يطلق عليه لخبطه و ايضاً عندما تفكر فى مواضيع كثيرة فى نفس الوقت و هذا ما يحدث احياناً بداخلى و اليكم هذه اللخبطه

1- الفضيله المزيفه :- هى التى تلى فعل الرذيله للحظات نابعه من تأنيب الضمير و ليس من فضيله متأصله
2- التغييب : - عندما يتحول الانسان الى دميه تردد كلاماً مسجل فى اوضاع مختلفه
3- النقد القاتل :- هو نقد لصاحبه لانه حتى الان لم يعرف النقد البناء
4- البيروقراطيه :- هى والده التسلط و جده الفساد و شقيقة التخلف و نسيبه الجهل
5- الابداع :- لفظ اصبح يطلق كثيراً بلا داع
6- مسكين من تصل امكاناته الى اكثر من سماحيه فعله فانه يترك ثمار تعبه للحرث
7- سوف تدرس هذه الفتره من تاريخ مصر للاجيال القادمه كا أسوء فتره من حيث الفساد السياسى و الاقتصادى . هذا لو كان لازال يوجد ما يسمى بمصر
8- الجراءه و الثقه بالنفس تضفى على المرأه جمالاً لا يقاس

لخبطه - 1

2006-10-25T04:09:00.000-07:00

عندما ترى مفترق طرق بدون اشارة او عسكرى مرور فستجد ان كل الطرق تسير فى نفس الوقت و الى كل الاماكن و هذا يطلق عليه لخبطه و ايضاً عندما تفكر فى مواضيع كثيرة فى نفس الوقت و هذا ما يحدث احياناً بداخلى و اليكم هذه اللخبطه

1- عندما يصل لمرحله الصدق مع النفس فانه يتوحد و عندما يتوحد فقط يصبح انسان
2- القبله الحقيقيه ليست مجرد تلامس بين شفتين و انما هى تواصل بين روحين ينتهى التلامس و يظل التواصل
3- من لا يكتب كتاباته لنفسه اولاً فهو غاش لا محاله معتلى بنفسه فوق الجميع فى غرور احمق
4- كم مرت عليا اياماً كلها ليالى
5- اخطر امراض العصر هو مرض سرطان الروح
6- اذا انتظرت ان تصفق لك الايادى فانك تضيع جهدك فى اقتناء عمله زائفه
7- اكره سقف البيت و حدود المدينه و اواخر الاشياء احب ان اعيش فى اللا محدود احب ان اعيش فى الله
8- عندما يخطف الفقير اللقمه من الفقير فهذه هى قسوه الاحتياج اما ان يفعلها الغنى فهذا ما تقشعر له القسوه ذاتها

اولاد الغضب

2006-09-17T16:54:00.000-07:00

كلام ده مقتطفات من جريدة المصرى اليوم 17-9-2006 فى صفحة مساحة رأى كتبته رانيا بدوى تحت عنوان الحكومة مريضة نفسياً

كيف يمكن للمسئولين عن هذا الوطن أن يغمض اعينهم ليناموا مستريحى البال بعد فضيحة تعذيب محمد المتهم البرئ فى مجزرة بنى مزار و يستجوبوة ...... خدعونا و عذبوه لنحتفل بأننا المغفلون و يحتفلون هم بنخب انتصار الهزيمة ...... فى فضيحة لن ينساها التاريخ فضيحة بنى مزار و فضيحة خداع الرأى العام و اتهام التخلف العقلى و المرض النفسى بأنه المسئول عن أسوأ مذابح البشر

و التعمية على الفشل الامنى الذريع المستديم

خداع تحول الى غضب فى البيوت و على المقاهى و فى مقاعد الاتوبيسات ..... الغضب له اولاد يكبرون و للوجع ايضاً اولاد سيكبرون ... مرارة زرعناها فى شبابنا فى غرف التحقيق و مراكز البوليس و فى السجون ... و احباط حقناهم اياه فى الجامعات واستنفار شحناهم اياه فى المساجد و الكنائس ...... لم يعد شبابنا يرسمون الخرائط و يتسلقون الجبال و يسرقون لحظات من الحب ..... شبابنا لم يتعلموا العدالة بل تشبعوا و احترفوا العنف

البدلة دايماً على حق

2006-09-11T13:05:00.000-07:00

البدلة دايماً على حق

البيانات الشخصية
الاسم: بدلة
النوع : مش مهم
اللون : اغمئات
الحالة الاجتماعية : محجوزة
الموقف من التطريز : لم يصبة الدور
محل الاقامة : شماعة رقم 5

للاسف فى بلدنا الغالية البدلة دايماً تكسب مش مهم مين الى لابسها او هوه صح ولا غلط بس الاكيد انه لابس بدلة والبدل ثمانها غالى يبقى راجل معاه فلوس يعنى ابن ناس او مش زى باقى الفقرا الغلابة يعنى لازم يكون على حق و الكلام ده عن تجربة شخصية يعنى مثلاً

لو دخلت قسم ببدلة و داخل كده واثق من نفسك محدش هيقولك رايح فين احسن تتطلع وكيل نيابة
و لو اخدت مراتك و لبست بدلة و نزلت تتمشى فى الشارع صعب جداً حد يعكسك احسن تتطلع ظابط
و كمان لو دخلت اى مصلحة حكومية علشان تقضى طلب و انت طبعاً لابس البدلة حاجتك تخلص هوا ده غير ان الكل هيقولك يا بيه احسن تطلع راجل مهم
و يا سلام لو كنت راكب القطار مثلاً و زعقت شوية بسبب او من غير سبب طبعاً و انت لابس ال هتلاقى الناس اتلمت و قعدت تهدى فيك احسن تطلع ابن ناس مهمين

سيدى الفاضل لو فكرت شوية هتتاكد من الحقيقة المرة ان فى بلدك البدلة دايماً على حق و ان حتة قماشة ممكن تضيع حق انسان

احذر هؤلاء

القائمة السوداء باشهر من يرتدون البدل
وكلاء النيابة ....... انا مقلتش حاجه
الظباط بجميع رتبهم ...... يجعل كلامنا خفيف
القضاه ..... يا ليلة سودة
نواب المجلس ...... يا حوستى يا اما

الناس ولاد الناس ...... ربنا يزيدهم كمان وكمان

اما الوزراء و رئيسم و الرئيس و ولاده فدول طبعاً بيلبسوا بدل بس دول خلاص ربنا فتح عليهم و بقوا مهمين حتى من غير البدل

واحد من الناس

2006-09-09T06:34:00.000-07:00

بعض مقتطفات من أفلام أعجبتني فحبيت أني اجمعها لكم يمكن تكونوا ماخدتوش بالكم منها :-

1- ( انا كل الي عايزة أنى احب و أتحب . أنا مش قد أن حد يكرهنى ) من فيلم عن العشق و الهوى)
2- مصر بقت قاسية اوى على اولادها ) من فيلم عمارة يعقوبيان

3- قبل ما تيجى تحط بلدك على الخريطة مش كنت تسأل الاول هيه فين الخريطة ) من فيلم فرحان ملازم آدم

4- ( العهد بسيط جداً لكنه يلزمنا ان نعيش مع بعض فى السراء و الضراء فى المرض و الصحة بالمحبة و الاحترام بنسيان تجارب الماضى حتى يفرقنا الموت و لكن الجزء الصعب هو ايجاد الشخص الذى يستحق هذا العهد و حينما تجده تعيش فى سعادة مطلقة ) من فيلم سهر الليالى ( الاجنبى

5- ( انتوا جماعة مش عارفة تبقى حزب و احنا حزب مش عارف يبقى جماعة . اتنين ديابة مينفعوش يعيشوا فى قفص واحد يقطعوا بعض ) من فيلم طيور الظلام

6- ازاى افرح و انا شايفة ابنى و هوه بيشحت بسمة او فرحة علشان يقضى بيها ليلة دخلته بعد ما عدى الاربعين ) من مسرحية الناس الى فى التالت

7- يوجد وقت للجرأه و وقت لالتزام الحذر و الرجل الحكيم يعرف كيف يستفيد من الاتنين ) من فيلم (dead poets society

8- (مصر دى سرها باتع مصر مش المسيحيين لوحدهم و لا المسلمين لوحدهم و لا عمرها هتخضع لحكم دينى و لكن فى الطريق هتكون خساير كتيرة لغاية ممصر الحقيقية تقول كلمتها فى النهاية ) من مسلسل الكومى

9- 30 احنا عايشين فى عالم وسخ و الى يكسب هوه الاوسخ ) من فيلم القاهرة

10- كفاءة السلطة تقاس بهيبه اصغر فرد فيها الى هوه ممكن يكون عسكرى متطوع و كان فى الاصل بلطجى ) من فيلم مواطن و مخبر وحرامى

11- ( من عاش فى الظلام طيلة حياته يعتبر النور شراً لانه يرهق عينيه ) من فيلم ( The Egyptian

12- ) رحلة الاستكشاف الحقيقية لا تتعلق بتغيير محيطنا بل بتغيير نظراتنا للامور ) من فيلم فرنسى ( Lucia Lucia

13- واحد من الناس زى كل الناس ناس عايشة بتجرى و شقيانه و اهى عايشة و خلاص مستورة مدام بابنا علينا مقفول بالترباس ) من اغنية فيلم و احد من الناس

عن الحب و السياسة

2006-09-08T16:03:00.000-07:00

خواطر متفرقة عن الحب و السياسة

1- الحب فى الافلام المصرية الحديثة عبارة عن اغنية و طرطشة مياه فى بحر و اتنين بجروا ورا بعض

2- لقد استطاع حسن نصر الله ان يهزم اسرائيل و لبنان بضربة واحده فهنيئاً لحزب الله و قلبى عليك يا لبنان من المتامرين و الخونة

3- مشاعر الحب هى مشاعل متقده تحرق من يسئ او يجهل استخدامها و تنير الطريق امام من يعرف و يحسن استخدامها

4- كتبت 9 / 2005 ( انتخابات الرئاسة )
انتقلت الى رحمة الله السيدة ديمقراطية بعد رحلة طويلة مع مرض الفساد اسياسى و العزاء بجميع بلدان مصر المحروسة

5-القائل بأن الزواج هو مقبرة الحب او نهاية الحب فهو لم يعرف يوماً معنى الحب و لكنه عاشق الانانية الاول

6- الحل الامثل لما يسمونه صراع الحضارات هو قيام الدولة الانسانية

بينى و بين نفسى

2006-09-08T14:59:00.000-07:00

بينى و بين نفسى بحكى كتير يمكن اكتر من اللازم

بسمع كتير يمكن فى وقت مفيهوش حد بيسمع كله بيتكلم كله بيكتب و مفيش حد برضه بيقرا لو قراتيلى تبقى تطمنى انه لسه فيه حد غيرى بيسمع و بيقراااااااااااااااااااااااا

خواطر من حكاياتى بينى بين نفسى:- .... 1

السلام عليكم و السلام لكم الفاظ لها نفس المعنى و لكن المفهوم الذى يتكون بالعقل عند النطق بها منتهى الظلم لللفظ و المعنى

من لا يضحك على تعليقات رئيسه بالعمل البايخه لم يمرض بعد بفيروس البيروقراطية و لكن الى متى فالفيروس محيط بنا من كل جانب

الصدق مع النفس هو اول مراحل الحكمة الفكرية و نهاية مرحلة المراهقة الفكرية فتأكد انك لا تكذب على نفسك حتى تبدا مبكراً

أكذب على كل الناس و لكن كن صادقاً مع نفسك فتكون صادقاً مع الكل حتى مع من كذبت عليهم